១- ព្រះហស្តព្រះគ្រីស្ទ មានចេស្តាម្លេះបង្កើតលោកិយ ស្ទួន
ផ្ទៃមេឃធំធេង ហ្វូងផ្កាយខែនិងថ្ងៃ
សមុទ្រព្រឹក្សព្រៃ មនុស្សសត្វអស្ចារ្យ
សារពើលើផែនដី និងអាកាសា
សុទ្ធសឹងជាស្នា ព្រះហស្តព្រះអង្គ ។
២- ព្រះហស្តព្រះគ្រីស្ទ មានចេស្តាម្លេះប្រោសអស់រោគផង ស្ទួន
ពាល់សាច់ប្រោសឃ្លង់ ឱ្យជាស្អាតហ្មត់ហ្មង
គហើយថ្លង់ផង និយាយស្តាប់ឮ
ប្រោសភ្នែកខ្វាក់ ពីកំណើតឱ្យបានភ្លឺ
ខ្វិនឱ្យងើបដើរ ទាំងរោគគ្រប់យ៉ាង ។
៣- ព្រះហស្តព្រះគ្រីស្ទ ដោះបាបយើងនេះនៅលើឈើឆ្កាង ស្ទួន
ស៊ូទ្រាំឱ្យគេបោះធ្លុះ ទាំងសងខាង
ភ្ចាប់លើឈើឆ្កាង ព្រោះបាបមនុស្សលោក
ព្រះហស្តទ្រង់ទ្រាំ ចុកចាប់ឈាមហូរជោគ
សង្គ្រោះមនុស្សលោក ឱ្យរួចវេទនា ។
៤- ព្រះហស្តព្រះគ្រីស្ទ ពេលឥឡូវនេះកំពុងគោះទ្វារ ស្ទួន
ព្រះហស្តទ្រង់គោះ ទ្វារចិត្តមនុស្សគ្រប់គ្នា
ក្រែងមានអ្នកណា បើកថ្វាយទ្រង់ស្មោះ
ទទួលទ្រង់ទុកជាព្រះ អង្គសង្គ្រោះ
ជាម្ចាស់ប្រោសលោះ រួចផុតពីស្លាប់ ។
៥- ព្រះហស្តព្រះគ្រីស្ទ ទុកស្នាមធ្លុះនេះនៅជាដរាប ស្ទួន
ទ្រង់បានសន្យា វិលមកវិញយ៉ាងឆាប់
ព្រះហស្តនៅជាប់ ស្នាមទាំងសងខាង
ព្រះហស្តនេះហើយ ដែលទ្រង់រៀបនឹងសាង
ផែនដីថ្មីឡើង ឱ្យអ្នកជឿទ្រង់ ៕